الله يسامح نظر عيني ويجزاه خير=صحى مشاعر بقلبي متعبه غافيه
قامت تلج النواح وبالحشا تستجير=تبحث عن احضان شوقٍ(ن)بالهنا دافيه
مثل الفراشات طاحت في لهيب السعير=ما حولها من دفاه ولا بها عافيه
من عقب فرقا وليفٍ(ن)للمشاعر عشير=الروح تاطأ على جمر الهوى حافيه
أحلام عمري ذبحها هجر خل وهجير=شاهت وجيه الحلوم ولا هي بصافيه
ترزح تحت ونة المشتاق شهق وزفير=محجوزةٍ(ن)خلف عوج ضعاف ونحافيه
ياليل عشق السهارى كيف مات الضمير=ما عدت تكسي لروحي حلةٍ(ن)ضافيه
ما نلت غير المواجع في عروقي نفير=وأحلام ليلٍ(ن)ثكالى فرش ولحافيه
ياليل وشبك تهاديني عنا مستطير=شيب رموش العيون وشيب القافيه
ما باقي إلا قليل العمر راح الكثير=أركض مع الدرب مقفي وأنظر خلافيه
ودي بليلة توقف للعذاب المسير=ليلة من العمر ليلة للوجع شافيه
ياليلة العمر وينك صار عمري قصير=الليل مظلم وشمعة ليلنا طافيه
ما عدت بقوى بعاد وصار صبري صغير=طال السهر والمسافة بيننا كافيه
وأنا أدري إن المحبة بننا طعم غير=لاني جفيت الغرام ولاهي بجافيه
أشكي جروحي على خلي وخلي خشير=في لوعةٍ(ن)بالحشا ماهي بتنشافيه
أقسى من الصخر وأنعم من خيوط الحرير=ترعى عروق الفؤاد بجور والطافيه
الله يسامح نظر عيني ويجزاه خير=صحى مشاعر بقلبي متعبه غافيه