الله الله ياهل السيل كونوا جاهزين=ولموا للكيف وأحسن رطب صيف النخل
يا هل الميقات بكره ضيوفي قادمين=جهزوا كل المطاليب لا يحصل خلل
باشروهم باشروهم بفل وياسمين=واسقوا الغالين من ذوب جانيه النحل
ضيفوهم كان قبلوا على سمن وسمين=وإن تعدوا وادعوهم بلا ضيق وزعل
ازرعوا درب البهيته ورود الجانبين=ولبسوا مسارهم بالذهب حل وحلل
صفوا اهل السيل بالسيل فيسار ويمين=بالورود وبالرياحين وأكواب العسل
صفقوا للموكب اللي أمامه نجدتين=قولوا أهلا بالمحل وأنت راعي للمحل
وإن ترجل من على موتره يا غانمين=اشعلوا للعود الأزرق ليا منه نزل
ويا عساكم يا هل السيل دايم سالمين=يا عزاةٍ(ن)بالمواجيب ما تعرف ملل
بالمكارم يا هل السيل دايم حاضرين=من قديم الوقت وثبيت ما تعرف بخل
يا رجالٍ(ن)بالمعالي سواة الفرقدين=ما توانا باللوازم ولا تشكي كسل
الله الله ياهل السيل كونوا جاهزين=ولموا للكيف وأحسن رطب صيف النخل