يا قصيدي تزهب دامني غنيت=
وسع لخاطري يا حلو طاروقي=
داخل الصدر ونة كنها عفريت=
هزت ضلوعي اللي فوق معلوقي=
من ضحى في نهار السبت لين أمسيت=
كن صدري على الأنفاس مطبوقي=
أتبع الونة الونة ولو أزريت=
الخلل بان في صوتي ومنطوقي=
كلها منك ياللي كل ما دقيت=
اتصالي يضيع بدون مافوقي=
لو مرة على الجوال ما رديت=
ليش هذا التغلي يا نظر موقي=
وأنت تدري بحالي كل ما صديت=
أشعر الدم بالشريان محروقي=
هات عذرك تراني حي مثل الميت=
بين يأس ورجا ماني بمسبوقي=
عل عذرك يسكت خاطري تسكيت=
لو الأعذار ما هي مطفية شوقي=
تشتعل من سنين وكل ما هديت=
لعبة الشوق فاح الدم بعروقي=
عز حالي ليا مني قهر ونيت=
كن ثقل السما مطروحةٍ(ن)فوقي=
ضاع عمري وعمرك بين كيف وليت=
ما مضى من زمن ماهو بملحوقي=
حلو الأيام في حبك تراي أفنيت=
يا بعد كل خلاني ويا ذوقي=
القصائد على شأنك ليا غنيت=
وسع لخاطري حبك وطاروقي=