سلام ياللي لها بأعماق قلبي متاع=وشلون حالك بعدنا بالبعاد الرهيب
قالت هلا يا مسلم في زمان الضياع=قلت البقا يا عجيبة بالزمان العجيب
ردت وهي حايرة بين الوصل والوداع=كلامها فيه نبرة ضيق وضعه مريب
تقول وش ذكرك بالوصل بعد إنقطاع=سؤال منها غريب لوصل ما هو غريب
قلت:السبب تعرفينه ماهويت إمتناع=ما حدني فوق هذا غيركم يا حبيب
ما بيننا يا مرامي سر ماهو مشاع=منقوش بأعماقنا ما فيه شكة وعيب
ما تذكرين لكلامك ياغرامٍ(ن)مطاع=وإلا تناسيتي لهرجٍ(ن)طرحني صويب
أيام وشهور مرتني وأنا بإلتياع=في داخل القلب جرحٍ(ن)ما عرفه الطبيب
كن الحشا في غيابك مدهلٍ(ن)للسباع=تنهش عروق الخفوق اللي علاجه صعيب
مالي دوا غير وصلك يا شبيه الشعاع=لا من تجلى بظلمة ليل مني قريب
أرتاح ويروق بالي يا جميل الوساع=اللي ليا شفتها كل المواجع تطيب
ما عاد أحس بشكاية هم وإلا صداع=سود الليالي تعود مثل لون الحليب
وإن غبت عني حياتي كلها في صراع=أضيع في عالمي بين الخطأ والمصيب
لكن مشكاي للي عالمٍ(ن)بالمراع=منهو طلبه المعونة واثقٍ(ن)ما يخيب
خلق لسبعٍ(ن)وسبعٍ(ن)عالياتٍ(ن)وقاع=وأرزاقنا يا بديع الحسن حظ ونصيب
كنت أطمع إنك تكون الحظ والحظ باع=يا شيب عيني من الأيام حان المشيب
اللي نريده ذهب ما عاد فيه إرتجاع=واللي نعافه قرب عقب الشروق المغيب
مسافة البعد زادت صار فيها إتساع=أطماع الأعمار حطينا عليها صليب
اللي بقي من ليالي ما تجيب إنتفاع=واللي مضى من ليالي ما لحقها طليب
رست مراكب ليالينا وطاح الشراع=أحلامنا شالها موج الصدود المعيب
أحلامنا وقعت من بعد طول إرتفاع=الوقت حربه ضروسٍ(ن)ما تريح حريب
لكن يا بعد حالي صبر مغليك ماع=ما عدت أنا ذاك القوي المهيب
بالمختصر ليت ما بيني وبينك ذراع=ما كان حسيت من بعدك سواة اللهيب
يحرق عروق الفؤاد وداعي الود داع=كن الحشا يفترسه بساعة الشوق ذيب
يا غاية الروح ملهم للقصيد المذاع=والله ما أنساك لو حظي لكم ما يجيب
سلام ياللي لها بأعماق قلبي متاع=وشلون حالك بعدنا بالبعاد الرهيب