ياليل أنا عذبت بالجوال=من حرقتي خربت أزاريره
عاند معي بالبث والإرسال=ياكثرها زنَّة تصافيره
ما يقبل لدقة ولا مرسال=تطلع على الشاشه محاذيره
طلع لروحي ياعساه يزال=لا رحم صناعه وتطويره
ضيع عليَّه فرصة الأعمال=مع صاحبٍ(ن)موعده ماغيره
ولولا المسافة بالميات أميال=سريت له بمقفصٍ(ن)سيره
اللي ليا دقيت سلفه شال=ما تسمع لطقة مساميره
كنه هبوبٍ(ن)في قدوم خيال=ما يتعبك في نهزته قيره
لوكان له جنحان صال وجال=كن الجنون يدق له زيره
لين أصل اللي خاطرٍ(ن)بالبال=لين أبصره وأسمع تقاريره
ماهمني بالدرب مهما طال=الدرب ما تتعب مشاويره
لكن حداني بالزمان أحوال=الشيخ تلعب به تفاكيره
أخاف من هرج القفا والقال=وإلا تحيرني معاذيره
يا صاحبي صبرك لها حلال=الكل بأمر الله وتدبيره
يمكن يغير حالنا لا حال=والوقت تزهر لك نواويره
وأريح الأقدام والجوال=اللي خرب دقي لأزاريره

إبداع مميّز
من شاعر مميز
في تاريخ مميّز