الناس وقت الضيق تبكي وترتاح=وأنا دموعي زود(ن)كل مابي
أنوح والخفاق من ضيقتي ناح=يا حسرتي يالوعتي يا عذابي
أسهر من المغرب ليا وقت الأصباح=أون ون اللي يعاني صوابي
من حرقتي الدم في داخلي فاح=كنه على نارٍ(ن)غلى وإقتلابي
كن الفؤاد مركزه فيه الأرماح=من طعنها ضاع الفكر والصوابي
بسباب خلٍ(ن)جود الطعن ثم راح=ماهو محسب حرقتي بالغيابي
ما يدري إن الود بحيان ذباح=يقضي على الأنفس بعز الشبابي
ماهو بذاكر قلب من سبته طاح=بعد ترنح من طعون الحرابي
ولع عليه النار بالصد ثم شاح=ذوق العذاب ولا تذوق الشرابي
هذا جزا منهو تجرا بالإفصاح=بعد العمار اليوم غادي خرابي
جزاك يا تباع برق(ن)ليالاح=نوٍ(ن)مقفي ما يسقي ركابي
ماجبت من مغزاي كسبات وأرباح=كني على ماقيل:طارد سرابي
ياليتني قبل العنا كنت لماح=ماكان صرت بحال ماني مهابي
الناس وقت الضيق تبكي وترتاح=وأنا دموعي زود(ن)كل مابي