ياليل اشهد على ما اقول لا تشهد على المنقول=تراني عفت لي ناسٍ(ن)يحسبون الوصال هبال
تسمع في قصيدي وافهم اللي بالقصيد أقول=رسالة واضحة للي يميز كل ما ينقال
رفيقي يفهم المقصود بالمكتوب عرض وطول=وأنا ماني زبون لشيء لا يشرى ولا ينطال
خلاص أنا عزمت أقطع علاقة حبلنا الموصول=ما دام إن الصدود أصبح علامة مقبل الأفعال
على شأنه ومن شأنه تركت العقل والمعقول=وفضلت البعاد أحسن من اللي كيف صار وقال
بأمان الله يا وقتٍ(ن)جمعنا والليال تهول=عرفت إن البشر مثل الليالي نازل ورحال
ابرحل وأترك المنزال والقى بالزمان حلول=ولاني بأول اللي يترك النزال والمنزال
بوسع صدري الضايق وأجرب حظي المجهول=كذا مدري كذا رحلة عمر والحال بعده حال
رفيقي بعد جافاني يجي له يوم قبل الحول=وأنا ماني بناشد عنه وشلونه وكيف الحال
ما عاد يهمني بعد التجافي جية المرسول=قطعت الوصل مثله يوم عني شح بالمرسال
وأنا أدري فعلنا كله مخالف عادةٍ(ن)وأوصول=لكن اللي بدا بالسالفة قطع لحبل وصال
ما عاد يفيد نرجع مثل ما كنا بدون زعول=على ما قالت الأمثال ضاع الحمل والحمال
مشاريه الزمن ما بيننا صارت ثقيل حمول=وأنا ماني بشايل حمل لا ينفع ولا ينشال
ياليل اشهد على ما اقول لا تشهد على المنقول=تراني عفت لي ناسٍ(ن)يحسبون الوصال هبال