ليلة تساوي الف ليلة وليله=نسيت فيها كل ما ضيق البال
ما بعدها ليلة تسمى جميله=مهما بقا للعمر من مقبل ليال
بعد فرحت بشوفتك ياخليله=كل هم شاله خافقي قبلك إنشال
تراقصت دقات قلبي حليله=من فرحةٍ(ن)ما ذاقها بكل الأحوال
موجوع له وقتٍ(ن)ومدة طويله=غايب عنه يابهجتي والبعد طال
يحمل هموم ثقال ماهي قليله=والبعد زاده فوق لوعته غربال
والليلة الليلة بعد هد حيله=عاد الأمل واليأس من داخله زال
بعد رجع غاليه نعمة جليله=الله لا يحرمه من عذب الأقوال
وقت البعد ماحط خلٍ(ن)بديله=والليلة الليله بها تضرب أمثال
إنزاح عن قلبي همومٍ(ن)ثقيله=بمسامر اللي ليلها يشرح البال
ليلة تساوي عمر مافيه ميله=ليلة ثمنها ما يقدر بالأموال
ليلة أصيلة والمسامر أصيله=سمارها شاعر وعاشق وخيال
أمثالها بين الليالي قليله=ليلة وفا ما عاشها كل رجال
ليلة تساوي الف ليلة وليله=نسيت فيها كل ما ضيق البال