سلام للي مطلبي جد وصلها=أرجي مواصلها وترجي وصالي
حلت بقلبي والمشاعر شعلها=سيد العذارى زاد بي إشتعالي
شبت شموع الشوق في قلبي الها=تربعت في قلب من حب خالي
بالهون ياللي عيبها في عجلها=مرٍ(ن)تعاتبني ومرٍ(ن)سؤالي
يا بنت ياللي حسنها في خجلها=عزي لحالي منك يا عز حالي
جتني رسائلها تبين زعلها=ليش الزعل خلي لصدرك شمالي
مكانتك بالقلب محدٍ(ن)وصلها=يا ساحرتني بالحسن والدلالي
فديت روحك والجفون ونجلها=اللي عليها الرمش سوى ظلالي
نجل العيون اللي خديني كحلها=زادت حلا ما كان يخطر ببالي
ولولا عيونٍ(ن)بارعة في عملها=ما كان نلتي قلب صعب المنالي
ولولا رموشٍ(ن)ذابحة من كسلها=ما كان يرخص لك من العمر غالي
ولولا شفاهك والشفا في عسلها=ما كان روضتي عقيد الرجالي
ولولا موارد غيرنا ما نهلها=ما كان جئت أشربك عدٍ(ن)زلالي
ولولا كلامٍ(ن)عذب ما قلت قلها=ما كان صرتي كاملة بالجمالي
تهناك روحي لين يأصل أجلها=ويهناك قلبي والعقل والخيالي
حياك ياللي مطلبي جد وصلها=أرجي مواصلها وترجي وصالي