تحلم وأنا أحلم والنتائج وخيمه=لا حلم حققته ولا جرحنا طاب
حلمٍ(ن)بلا مصلوح مافيه قيمه=وحب الجفا لوهو مريحك ينعاب
ومن لا ترفع عن مواطن ذميمه=لو هو بري الناس بتقول:كذاب
ياللي سكنت بروح ولهى هميمه=فرشتك الأطياب وغطاك الأطياب
ما باقي الا ذكرياتٍ(ن)قديمه=ترتاح منها أعصاب وتبوز أعصاب
أيام واقفت والمشاعر سقيمه=والجرح ينزف ما يفيدن الأطباب
قسيت بعد لينٍ(ن)قلوبٍ(ن)رحيمه=باعت هواها ما عرفنا بالأسباب
ياشينها لا باع خلٍ(ن)نديمه=يشيب منها الراس لو كان ما شاب
ظليمةٍ(ن)ياكبرها من ظليمه=لا من رخص بالعين غالين وأحباب
ياللي سحابك في سماء العشق ديمه=وأنا صحاري تطلبك قطر سكاب
لظى سمومي ما تبرده غيمه=دام الكبود يبوس مافيه مشراب
تصعب مودتنا تعود سليمه=مر الندم ما يبري لقلب منصاب
البعد لو إنه مصيبة غنيمه=أخير من شكوى مواجيع وعتاب
والصبر بلوى والمقاطع جريمه=والصمت في بعض المواقيف غصاب