قلت:وينك غايبة لا سلام ولا كلام=الرسائل تأصلك ما يجيني ردها
كل صبح وكل ليلة مراسل السلام=تطرق أبواب التواصل وصمتك صدها
لو تقولي ليش هذا التجاهل للمقام=كان ريحت الهواجس وعرفت قصدها
قالت:الدنيا ونفسيتي ماهي تمام=الظروف تحدني والزمان يحـدها
قلت:صبرك حال الأيام ماهو مستدام=كل ضيقة شرحة الصدر تاتي بعدها
إضحكي وارمي همومك على حكم العدام=لا تشيلي هم دنيا شحيحٍ(ن)مدها
قالت:أدري عارفة بالحلال وبالحرام=مير نفسي واصل الضيق معها حدها
حايرة ما بين واقع حياتي والحلام=المشاعر بالحشا كيف أبيح سدها؟
خائفة من هرج ناسٍ(ن)يحبون الملام=عالمٍ(ن)ما ودهم غير نخطب ودها
قلت من عاين رضاهم نهايته السقام=لا تشيلي هم ناسٍ(ن)خسارة كدها
إرتقي فوق السحائب على ظهر الغمام=وإفردي للأشقر اللي يدفي بردها
إمطري شاعرك بإحساس يشعل للغرام=بالعروق اللي تعاني مواجع ودها
من سنين أنطر مجيك وعامٍ(ن)بعد عام=يمك عيوني تزايد بدربي لدها
بادريني يا سحابة ببرقك لي وسام=فوق صدري برقها والمشاعر رعدها
مرت سنينٍ(ن)طويلة مواريدي حيام=تنتظر همال غيثك وتروي وردها
ليش عني غايبة لا سلام ولا كلام=الرسائل تأصلك ما يجيني ردها