اسمعي يا بنت مني طوارف سالفه=سالفة ما جاء كماها على مر العصور
ما هويتك يا هوى البال حكم مصادفه=أنت أثبت في خوقي من هموم وسرور
الخفوق اللي ملكتيه حبك عاسفه=من سنين القلب ينزف من أشواق وحرور
كل ماهو تفعلينه فؤادي والفه=أحسبه للولف حَسْنه ولا أعده قصور
وإن شكيت أشكي لحظي و وقتي كاتفه=حال من دون المقاصد وزاد الجور جور
يا هواي الروح من زود عشقي ناشفه=أتوجع من جروح الهوى وأشكي ثبور
إن طلبتك حاجتي صاب حالي راجفه=مير سوي ما تبي بالغياب وبالحضور
ارقصي يا بنت فوق الجروح النازفه=لا يهمك ارقصي لين ترضين الغرور
وأدري إنك يا غرامي بحالي عارفه=مير حظي ساعد الوقت في بعض الأمور
حال دونك وقتي اللي سهومه طارفه=ما يريد إلا طعوني بلا حس وشعور
إن بغيت أجيك عد الوصال مخالفه=وإن بغيتي تأصليني حسب وصلك شرور
علميني ويش حل الهموم الجارفه=قل صبري ماني اللي حسب علمك صبور
الهوى والشوق والبعد والله سارفه=تذبح المتعافي وشيلها كسر الظهور
ذي نهاية سالفة من بدايه سالفه=سالفة ما جاء كماها على مر العصور