أسعد الله كل أوقاتكم
اليكم تخاريف الصباح علها تروق لكم
فدتك الروح ياللي حبها خالج لنبض الروح=تشارك للجسد بالروح والإحساس والغيره
فديت اللي مروضني هواها مايعيز شروح=تحلت وإستحلت خافقي حسه وتدبيره
لها بين الضلوع العوج عرشٍ(ن)ماسكنه ملوح=مخصص للغلا والجسم كله موطن وديره
حميته عن جميع البيض غير لخيلها مسموح=وطنها لأمرها والفاتنة برياضه أميره
فؤادي موطنك ... ولسان الهوى مفضوح=أنادي محرمي ... لو كان إسمها منيره
تدلل يا بعد عمري على صمتي وكل البوح=فداك القلب يا نبض الحياة بكل تفكيره
يكفيني تقول :أهواك لو قولك كلام مزوح=جميع اللي تقوله حلو مالي مطلبٍ(ن)غيره
أحبك وأعشقك وأهواك مقسومي كِتب باللوح=قبل نُخلق وحان اليوم في دنياك تكبيره
معي وإلا بدونك مشغلٍ(ن)فكري بفرح ونوح=تحرك للمشاعر والمشاعر شعري تثيره
ليا مني ذكرتك حزة الضيقة تصير فروح=تبسم لك حروف الشوق لهف بدون تاخيره
صحيح إن الغياب المر يترك بالشعور جروح=يسم الحال لكن الوصل ينهي لتعكيره
فديت اللي يواصلني ويعطيني بغير شحوح=مشاعر ما تقاس بمال ماجا منه تقصيره
فدتك الروح ياللي حبها خالج لنبض الروح=تشارك للجسد بالروح والإحساس والغيره