أسعدكم الله بكل الأوقات
اليكم الأبيات بدون مقدمات
ياللي سكنت القلب والدم والروح=كلي لحبك يا هوى البال ساحه
بنيت لك في داخلي عرش وصروح=جار الزمان وظالم البعد أطاحه
قلبي غدى من شدة الوجد مذبوح=يشكي على نبض المشاعر جراحه
سجين بين ضلوع صدري ومطروح=ماعاد يعرف في دفا الصدر راحه
دمي دموع القلب ومطول النوح=أحرق عروق الحال سافح نواحه
تلعب به الأشواق ويسر ويبوح=لطيفك بعد قصر الفؤاد استباحه
أحرق بساتين الأمل حلم مجروح=الدم يغلي قايد الشوق فاحه
يبست عناقيد الهوى عقب الإشحوح=اللي من أول داخل الروح واحه
من يوم شفت البعد في جوك يلوح=اليأس قلبي ياغلا الروح لاحه
نسيت من وجدي مسرات وفروح=ضيعت ثلثين الذكا والنصاحه
ما عاد بعرف وين من بعدك يروح=ياللي حكمته بالغلا والصراحه
من يوم كاد الوصل ماصار مسموح=كل الظروف تحدني للمناحه
كل ما طرا لي طاريٍ(ن)فيه مصلوح=هاجمه جيشٍ(ن)من عنا ثم أزاحه
لاني ولا شعري بعد غبت مملوح=الشعر شاين فارقته الفصاحه
أعذب قصيدي صار مخنوق مبحوح=حلو القوافي ماتعرف الملاحه
رباه يارحماه قدوس سبوح=إرحم لعقلي قبل فقد الرجاحه