مساكم وصباحكم سعادة وهناء
أبيات كيبوردية علها تكون خفيفة على قلوبكم
هذا زمن السرعة
ياللي تقول العطر بالزين جذاب=
شكل غرامك للعذارى صناعي=
هواك للزينات من ريح الأطياب=
أثر طباعك ما توافق طباعي=
ماهو بكافي للهوى نظرة إعجاب=
ولا هو بكافي عطر هاج إلتياعي=
عشقي لهن فطري بلا داعي أسباب=
ذي نظرتي في حبهن وإنطباعي=
انا غرامي ريح زاميت الأتراب=
القا بها ذاتي وفيها ضياعي=
نجل العيون وسود ركزات الأهداب=
وصاف الجبين اللي غدا له شعاعي=
والسابح اللي فوق الأمتان منساب=
والمنطق اللي يطربك بالسماعي=
يلقى بها راع الهوى كل ما طاب=
تعلن لها روس الملوك إنصياعي=
ذاك الذي يأسر رجيحات الألباب=
ترخص على شأنه جميع المساعي=
الزين مايرحم شبابٍ(ن)وشياب=
كلٍ(ن)بذل له بالعمر ما إستطاعي=
وإن حالت الأحوال من دون الأحباب=
يبقى هواهم بالصدور الوساعي=
الحب لأرواح المواليف غلاب=
ما ينمسح بقلوب عطشى جياعي=
ممزوج بالأجساد مع دم وأعصاب=
دام الغلا غالي محالٍ(ن)يباعي=
ترخص على شانه مماليك ورقاب=
وأحيان من شأنه يكون النزاعي=
حب الشرف يغلب على كل الأطباب=
وحب الدنس يشبه لسم الأفاعي=