أسعدكم الله بكل خير
اليكم تخاريف الصباح
الجادل اللي عينها تطرح الطير=ماهو بصعبٍ(ن)تطرح لشخص ماشي
اللي رماني رمشها حزة عصير=أسرع من النوضة بقدحة فلاشي
عينٍ(ن)تعجل للنفوس المقادير=من صابته ما يهتني بالمعاشي
يقضي حياته في هجوس وتفاكير=يجفاه نومه لن خلد للفراشي
ماكنه إلا تحت جنبه مسامير=الدم كنه مي في قدر طاشي
جاي له فوق الجسم مثل الفواوير=ينضح عرق ما كنه إلا رشاشي
يكتم مواجيعه عن مشاهد الغير=يسمر مع أطيافك لوقت الغباشي
واليوم كله يشغله بالمشاوير=لو كان ماله حاجةٍ(ن)بالتماشي
يرقب عيون الغيد ويقول:ما خير=ما فيه عينٍ(ن)مثل عين النشاشي
اللي رماني حين كنا مسايير=في موقعٍ(ن)مافيه بالناس واشي
يالجادل اللي عمرها توه صغير=هواك عقب بالخفوق إرتعاشي
روضتني والحب مافيه تبرير=أول بداياتك على الذبح ناشي
يالجادل اللي عينها تطرح الطير=ذبحتني وأنا على الأرض ماشي