أسعد الله مساءكم بكل خير
اليكم ما جادت به القريحة الأن
...............
طير الغرام اللي سكن عينك=يا ويل قلبي من نظر عينه
شب الهوى ما بيني وبينك=هدب عيونك هي جناحينه
خطف لقلبي والبلا زينك=عليه يشحذ حد سـكينه
قطع بها خلسة شرايينك=وجز لخفوقي من شرايينه
وإن كان دينه بالهوى دينك=وشلون مثلي يحفظ لدينه
وافقت تكويني لتكوينك=والعشق فينا بان تكوينه
برمي بروحي عدل بيدينك=دامي الهوى جايبك بيدينه
خذي لروحي فدوة سنينك=كلي فداك وفدوة سنينه
قلبٍ(ن)سكنتي فيه ما يهينك=لو كان بالنيران تكوينه
الله يعين القلب ويعينك=القلب من يسكنه ما يهينه
مهما ظروف الوقت يحدينك=قلبي صعيبٍ(ن)عنك يحدينه
سيان عندي زينك وشينك=الحب يا شينه ويا زينه
البعد والأشواق يكوينك=مثل فؤادي يوم تصلينه
النار جوفه من طواعينك=متى تحني ثم تداوينه
اقرأ ظنوني في دواوينك=خائف على الخفاق تنسينه
في غيبتك بصيح بك وينك=وليا حضر صيًحت به وينه
غديت لك شيخ لمجانينك=الحب ما تعقل مجانينه
بانت على شعري براهينك=والشعر ما بانت براهينه
يمشي معك حسب قوانينك=وأنا معه حسب قوانينه
طير الغرام اللي سكن عينك=يا ويل قلبي من نظر عينه