الليل من غيرك ثقيل(ن) كما طويق=جاثم على صدري بليا هـواده
اغشى من الضيقة بلياك وافيق=الراس ما يرتاح فوق الوسـاده
الحلق ناشف ما تبلل من الريق=وانفاس صدري كن فيها وقاده
تطارد الانفاس فيني من الضيق=والنبض بعروق الحشا في زياده
شيبت من شأنك جميع الواريق=أبا السعادة ما لقيت السعاده
أنظم قصيدي فيك يا عله ايليق=تعلقه بالصدر مثل القلاده
منك المعاني ياشموخ الشواهيق=ياعذبة المنطوق والطيب عاده
هواك فيني حل ما فيه تبريق=جود عروق القلب مني جواده
وثق لقلبي يا أريش العين توثيق=ماخذ على كل المشاعر رياده
ذقت بهواك اللي من الحب ما ذيق=هذا إعترافي ما يعاوز شهاده
الأمر ما يحتاج يا زين تحقيق=نار الهوى عيت تعود رماده
لكن على ربي جميع التوافيق=والشكر للمولى لحبك عباده
بسهر مع الأطياف حتى المشاريق=أقلب الهوجاس فوق السناده
الليل ياشينه ثقيل(ن) كما طويق=جاثم على صدري بليا هـواده