ياعين نامي واخزي ابليس ياعين=خلي جفوني تهتني بالمنام ِ(ي)
ماذقت طعم النوم ياعين يومين=أسارق لنومي مسارق حرامي
ودي بشوف صويحبي كامل الزين=اللي نهب قلبي بحلو الكلام ِ(ي)
هواه في قلبي سكن عدة سنين=وصل غرامه لين حد العظام ِ(ي)
ما هو غرام ليوم وإلا ليومين=هذا عديل الروح مصدر غرامي
يسوى بعيني بالعذارى ملايين=لو غاب عني يوم يكثر سقامي
أعشقه عشقٍ(ن)فاق عشق المحبين=عشق الفقارى للأمن والطعامِ(ي)
وأعشقه عشق المغفرة للمصلين=وصحبة محمد في جنان السلامِ(ي)
عشقي لولفي فاق عشق المجانين=قيس وكثيًر علهم للرحامِ(ي)
عشق القلوب اللي على منهج الدين=ما هو بعشق محللين الأثامِ(ي)
مهما تكون ظرف بالعسر واللين=هواه فيني فوق عشق الأنامِ(ي)
أهواه لين الجسم يلتف بالطين=ويصير فوقي بعد دفني ركامِ(ي)
وصيتي لن رحت تكفين تكفين=ياعين مضنوني عداك الملامِ(ي)
تصبري يا عين لا عاد تبكين=لا تنثرين الدمع كالجمر حامي
وإن راح قبلي قلت ياعين ذا لحين=هلي دموعك مثل وبل الغمامِ(ي)
ياعين نامي واخزي ابليس ياعين=خلي جفوني تهتني بالمنام ِ(ي)