الأبيات بدون مقدمات
.....
اللي من أول فاتنة حسن وأطباع=تجري بقلبي مثل ما يجري الـدم
كانت اليا من غبت يومين تلتاع=واليوم أغيب شهور ما عاد تهتم
إن قلت وينك طقت اصباع باصباع=ما كني الا ذابح أخو وبن عـم
مدري جفا والا تغلي من إشباع=والا تبيني الزم الصمت وأنطم
ما كنها اللي ماض الأيام مطواع=ولا كنها اللي راعية يا هلا سم
تغيرت واللي مضى بالزمن ضاع=ما باقي الا ذكرياتٍ(ن)كما الحلم
تغيرت أوضاع الأيام بأوضاع=وتبدلت أفراح الأعمار بالغم
حارت عقول وضاقت صدورٍ(ن)وساع=ما عدت ذاك اللي صبورٍ(ن)وله عزم
ولى زمان أكيل للصاع بالصاع=غادي سواة اللي من السم منسم
واللي سقمني صاحبٍ(ن)كان فزاع=رمى بقايا الحلم في داخل اليم
وشلون عاد أجيب حلمٍ(ن)من القاع=من عقب حلمي فوق موجه تحطم
سفينة الأيام تسبح بلا شراع=واللي بنيته في زماني تهدم
ماهو بقي بقضيه مرعوب مرتاع=من حظي اللي ما يعرف التقدم
واقف مكانه للمواجيع منصاع=حاولت تعليمه لكن ما تعلم
طول العمر وأنا ورا الحظ تباع=لكن حسافة حظ ماهو بيرحم
ما نلت منه إلا معاناة الأوجاع=تنهش بقلبي والغرام متحكم
غرام منهي فاتنة حسن وأطباع=يجري بقلبي مثل ما يجري الدم