أسعدكم الله بكل زمان ومكان
يا الربع ام العيال زعلت علي تقول فيه قصيدة لك شكلك كاتبها بوحدة منهي
عاد أنا دائما كل ما أكتب قصيدة أقول هذي فيك يا قرة عيني
لكن هالمرة صادتني
ههههههههه
حبيت أطيب خاطرها بهذه الأبيات
يافتاة المشاعر ودي أنظم قصيدة=خارجة عن مسارك بكسر الاحتكار
بكتب الشعر بخدود البنات النهيدة=وأرسم الكحل بعيون العذارى الصغار
ودي أشوف كل الناس مثلك سعيدة=تحلم بقرب مني لو ساعة نهار
أدري بتزعلين من الهجوس الجديدة=وأدري إنك تغاري مثل ماني بغار
خلي الناس تلحق من قصيدي وحيدة=وباقي الشعر عارف بإتجاه المسار
فيك كل القصائد يا غناتي فريدة=والقصائد بغيرك زوبعة في غبار
كل طاروق ما أنتي فيه لو هو نشيدة=لازم إنه يجي به خلةٍ(ن)وإنكسار
كم كتبت القصائد فيك عذبة رشيدة=وكم جمح بي خيالي خارجٍ(ن)للمدار
المشاعر ليا من جات ماهي بأكيدة=القصائد تجي رماد لو فيه نار
كم نظرة تحرك فكرتي يا مجيدة=وكم فكرة تجي من ماش بالإنتظار
مثل الأخبار نقراها بصفحة جريدة=والحقيقة خلاف لكل ما قيل صار
القصائد تلون بين لين وشديدة=دام فكري سليم وبالشعور إقتدار
شاعر مروض بشعري مهارٍ(ن)عنيدة=والخطأ بالقصائد يوجب الإعتذار
يا فتاة المشاعر ودي أنظم قصيدة=خارجة عن مسارك بكسر الاحتكار