يا ساكنة بين عقل وبين عين وصدر=الليلة الشوق طاغي ينهش القلب نهش
ودي بشوفك وقربك ياعيون النظر=الليل موحش بدونك ياعطور المرش
أنا وحلمي وعلمي يا شبيه القمر=نطمع نسامر لذاتك يازعيم البوش
ليت السهر معك يحصل لو ليلة عمر=نروي عروق المحبة من جفاف العطش
لكن ياليت ماجابت جميل السهر=لو جابته كان عقلي في لقاك اندهش
اساهر الليل وعيوني لطيفك ممر=تعبت من زود مابي من غرام وطفش
القلب بالجوف كنه مندفن في جمر=والصدر من حر مابه بالقصائد جهش
ما عاد فيني صبر ما عاد فيني صبر=الصبر والعزم مع طول السنين انكمش
حتى كلامي تقلص بالنثر والشعر=معاني الشعر جاها في غيابك عمش
أمسي بليا خبر وأصبح بليا خبر=القلب محتر والهاجس تعب وإرتبش
يا ملهمة للقصائد حل وإلا سفر=الشعر من زود مابي من هواك إبتلش
ما عاد يكفي قصيدي يخبرك بالقهر=اللي توطن فؤادي مثل سم الحنش
مغيبتك يوم عني مثل غيبة شهر=والله ما أقوى غيابك والهجر والطنش
وإن غبت عني شهر بقول غائب دهر=القلب يحسب غيابك كل ما يرتعش
يا ساكنة بين عقل وبين عين وصدر=الليلة الشوق طاغي ينهش القلب نهش