أسعد الله أوقاتكم بكل خير
الأبيات بدون مقمات
....
يابريق الشوق بعيون السهر=كمل السهرة على لحن القصيد
هذي الليلة ظلام بلا قمر=غاب نور البدر والدامس شـديد
من غروب الشمس لا وقت الفجر=أصنع الأحلام وأنهيها وأعيد
في حشاي الشوق مشعل للجمر=جفف الدمعات في عين السهيد
وفي خفوقي لهف ماعمره صغر=متعب الشريان وأتعب للوريد
كم تصبر خافقي حتى ضجر=من حلومي والزمان اللي مكيد
ضعت أنا وإياه في غبة بحر=أخذ مني للجديد وللتليد
ما بقا لي غير شعري والقهر=هي رصيدي ما سواها من رصيد
لي شهور ارجي وليفي وانتظر=يرحم لحالي قبل جرحي يزيد
مير حظي والمسافة والدهر=حايلة ما بيننا مابه جديد
كل يوم يمر يعدل له شهر=قرًب الارواح ولقانا بعيد
ما تهنينا بحل ولا سفر=حظنا فارض علينا الف قيد
الألم يكبر بميدان الصدر=لا سعدت ولا رجا عمري سعيد
عمرنا يمضي ودنيانا ممر=ما تحقق شيء من حلمٍ(ن)نريد
يابريق الشوق بعيون السهر=كمل السهرة على لحن القصيد