أسعد الله أوقاتكم بالخير والمسرات
ويستمر التواصل بدون فاصل
اليكم ما جاد به الزمن من سوالف الليل
الأبيات نظمت ونُسقت ورفعت اليكم بوقت قصير جدا
نلتمس منكم العذر والسموحة لو فيها قصور
يا ما حلا ليل السمر معك ياللي=سوالفك تجلي عن القلب همه
لا من سمتك خاطري يسمهلي=والقلب ينسى معك خاله وعمه
أنصت لك بسمعي وحسي وكلي=يرتاح نبض القلب ويروق دمه
يا وردة الجوري وكادي وفلي=شذاك بالأنفاش خشمي يشمه
كلك على بعضك حلا ومتجلي=مثل البدر نصف الشهر في متمه
فيك الأدب والذوق مكسي بدلي=يا أدعج غنج والشهد مجناه فمه
ذوب العسل بين الشفاه متحلي=لو يمتزج بالبحر حلى ليمه
دائم على الزينات فوق متعلي=يا قاهر التلعات جهله وحلمه
فدتك روحي يابعد كل من لي=يا من غرامك خافقي فيه ضمه
أنت الهوى وأنت الغلا وأنت خلي=عندك دوا لجروح حالي وسمه
أي والله أعشق منك حتى التغلي=لا صار منك الشوق بالحال خمه
يا مشغلتني كل ما قمت أصلي=طيفك يشاطر خافقي نص فهمه
ما دام حبك حاكمه ومتولي=في كل وقت وحال مأخذ لقسمه
يا ما حلا ليل السمر معك ياللي=سوالفك تجلي عن القلب همه