أسعدكم الله
أخر الليل تزين الطواريق
اليكم الأبيات علها تروق لكم
الله عليها جامعة حُسن وإحساس=من مدعس الأقدام لين الجدايل
حلا بلون وعود وأطياب وأنفاس=أدب و ذوق ومنسبٍ(ن)من حمايل
شيمة وقيمة حالية عذبة أوناس=ما هي كما اللي زينها بالتحايل
فيها شموخ وعز مرفوعة الراس=العز فيها ما يحاوج دلايل
ما طبت لسوق الردية والأدناس=حرة عزيزة من بنات القبايل
بين الجواهر كنها نادر المأس=وبين الصبايا نادة بالفصايل
الزين فيها غير عن باقي الناس=جمالها سوى بقلبي هوايل
حرة تعشقها من الطير قرناس=وأنا مولع بالأصل والأصايل
غرامها بالروح نارٍ(ن)ومقباس=ماله بقلبي بالليالي بدايل
غرامنا ماله حدودٍ(ن)ومقياس=ماهو غرامٍ(ن)نمقته الرسايل
ولا هو غرام دروب بالرجل ينداس=وإلا سوالف لأجل قيلٍ(ن)وقايل
إلا هواها جمر بالقلب قباس=والشوق يقدح في زنود الفتايل
ما كني إلا بن يقلاه حماس=سخرت من شأنه جميع الوسايل
ليل ونهار الفكر بالحب محتاس=أنظم على شأنه جميل المثايل
لا باس يا قلبي من الوجد لا بأس=صبرك على جمر الهوى والغلايل
لأجل الغلا متاعب العمر تنباس=ما للجميلة غير جزل الجمايل
الله عليها جامعة حُسن وإحساس=من مدعس الأقدام لين الجدايل