مساكم/صباحكم خير وبركات
واليكم الأبيات علها تروق لكم
هبت على قلبي عواصف بها نار=شبت وقايد بالضلوع النحيفات
من يم دار اللي ملكني ولا شار=ما شارني ساعة رماني بلحظات
لو جار قلت الزين ممنون ما جار=يفداه دم القلب لو كان قطرات
وتفداه روحي والمعالق والأنظار=وتفداه بالدنيا ممالك وزينات
هذا الذي يستاهل لنظم الأشعار=يستاهل أسهر لجله ليال ما بات
يستاهل أصنع له من عروقي أوتار=وأعزف غرامه فوقها لحن وأبيات
يستاهل أزرع له من أحلامي أزهار=وأرشها بعطور حرقة ولوعات
وأنسج لها من غالي رموشي دثار=والعين بعطيها لسيدي مرايات
لأجل الغلا بعطيه روحي والأفكار=وأعطيه حسي والمشاعر وعبرات
بعطيه باق العمر لو باقي أعمار=وأبكي على عمرٍ مضى قبلها فات
يا ليتني وإياه من يومنا صغار=عشنا سوى في جوف ذيك البنايات
ما كان صرنا اليوم كل واحد بدار=نحصد هموم ونجني أوجاع وآهات
هذا قدرنا وشنسوي بالأقدار=تدبيرها بيدين رب السموات
يالله تسقي دار خلي بالأمطار=يا واسع الرحمات عجل برحمات