حاولت أكون أقرب من الرمش للعين=لكن حسافة كنت يا زين جافي
جئتك وأنا كلي هوى للمحبين=وأحسبك مثلي بالمحبة خرافي
لقيتك أبعد من حلوم المساكين=اللي سماهم في شتاهم لحافي
طعنتني من غير رمح وسكاكين=طعنة عدوٍ(ن)منقهر ومتعافي
هذا جزاي الله يجزاك بالدين=من شأن تعرف غلطتك وإرتجافي
ساعة وهبتك حس قلبي بلا شين=وأحسبك وافي بس ما أنته بوافي
ما كنت أظنك تقسم القلب نصفين=بعد وهبتك خافقٍ(ن)جاك صافي
غلبت في عيني جميع المجافين=خليتني أمشي على الشوك حافي
وشلون ببقى حي يا معلن البين=ما صابني يا واهب الموت كافي
دامك تحاكمني بحكم المعادين=ما عادني وإياك برجع خلافي
جربت مقداري مع العسر واللين=وأيقنت مالي في طرفكم تصافي
بان الجفا ماني محاوج براهين=ومن عافني لا بد مثله بعافي
عسى خلفنا زين صرنا بعيدين=واللي بعيد عن النظر ما يشافي
ما عادني واياك خلان تدرين!=طعن التجافي مثل طعن الرهافي
ببعد بعيد وزبدة العلم ذا لحين=البعد للمجروح ينسي وشافي
حاولت أكون أقرب من الرمش للعين=لكن حسافة كنت يا زين جافي