‏يانسمة الليل الحنون وجمرة الشوق الدفين=هالك المشاعر سامريها لين يذن للفجر
داوي جروحٍ(ن)عقبتها بالحشا غبر السنين=هذا ملخص حالتي باقي تفاصيل الخبر
طيفك يغازل ليلتي ما بين رمش وبين عين=طول السنين الماضية طيفك نديمي بالسهر
أعوام ياما عذبتني بالبعاد وبالحنين=الشوق يعصر بالمشاعر يابعد نبضي عصر
ودي بقربك مير حظي والزمن حكمه لعين=كن العنا من دون كل الناس فوقي اقتصر
اُواه يا قلبي علام الحظ قاسي ما يلين=لويش انا حظي كذا متعوس من بد البشر
حاولت أزين للظروف القاسية عيت تزين=اليوم هذا مر والباكر يجي طعمه امر
كل ما دنوت من الحبيب اللي له الخافق مدين=يفتر حظي من جديد ويبعده كيد وقهر
الظاهر إن الحظ ماله لا عهود ولاش دين=واللي كتب فوق البشر وكاد ما منه مفر
لازم نشوف اللي كتب لأعمارنا فوق الجبين=مهما جزعنا ما لنا غير الصبر فوق القدر
حظي تطرف بالقساوة ماش عنده بين بين=مثل تطرف داعش اللي طالعة هذا العصر
أجامله وأسايره لكن حظي حيل شين=وده يفرق بيننا حسبي على حظٍ(ن)غبر
المختصر يا شمعة الليل الحنون الله يعين=الحظ معلن للقهر هذا خبره المختصر
‏يانسمة الليل الحنون وجمرة الشوق الدفين=هالك المشاعر سامريها لين يذن للفجر