أسعدكم الله بكل مان وزمان
اليكم خرافات أخر الليل علها تروق لكم
الأبيات
قرب الفجر يطلع ياعيون الشقا=ما تريحت لو ساعة بليِّن فراش
طول ليلي وأنا افكر بذاك اللقا=لحظةٍ(ن)نادرة لكن راحت بلاش
إنتهى وقتها والذكر منها بقا=مشغل الفكر طول الليل لين الغباش
كل ما صار كنه ماثلٍ(ن)مااتقا=ساعةٍ(ن)في مقاس الوقت بتعد ماش
حلمي اللي حلمته صار واتحققا=قبل عامين صابك يالقلوب إندهاش
والليالي تلم أحباب وتفرقا=بسمة الفرح تقدح مثل قدح الفلاش
التقينا ملاقاة أصدقا لأصدقا=من فرحنا تحيتنا كساها ارتباش
ماتوقعت شوفة صاحبي ما هقا=مد كفه لكفي بالكفوف ارتعاش
رحب بجيتي رديت له بالبقا=العواطف يصارع مدها الإنكماش
اجتمعنا على طيب وعفاف ونقا=وافترقنا وحلو الود ما عشت عاش
منزرع بالخفوق اللي بحبك رقا=فوق كل المنافع ما خلطه الغشاش
ود عن ود ياعذب اللما يفرقا=دامت قلوبنا بيضٍ(ن)مثل لون شاش
يافؤاد الوليف اللي ملاه التقا=الله إنه يحفظك من عيون الوباش
ويا مكانٍ(ن)جمعنا ياعساك السقا=من غزير السحاب اللي بقدمه رشاش
عل سقياك تطفي واهجٍ(ن)أحرقا=نبت ذاك المكان اللي غصونه هشاش
يمكن الله يريد ونجتمع برفقا=بنفس ذاك المكان اليا غشاه انتعاش
الليالي تمر وعمرنا يُسرقا=لين نغدي بتال العمر مثل القشاش
حلو الأيام خلف ظهورنا نفهقا=والمواجع نقدمها على الروح كاش
وإن مضى عمرنا ما فات ما يلحقا=مالنا من ملاذ إلا الصبر والطناش
ياقصيدي عبر موج الفضا تبرقا=قبل عيني يفارق طرفها الإرتماش
الفجر شق نوره ياعيون الشقا=ما تريحت لو ساعة بليِّن فراش