السلام عليكم ورحمة الله وبركاته
خاطرة شعرة بليلة سفر
علها تروق لكم
الليل والغربة وهمي وحالي=تفتح علي أبواب وتقفل أبواب
لكن هذا حال بعض الليالي=لولا تقلبهن ذا الراس ما شاب
تبعدك عن غالي وتبعد لغالي=تدنيك للقاصين وتحيد أحباب
ولو كنت بشكي من زمان مضالي=قسم برب الخلق ماني بكذاب
فكري تعب من كثر مطرح سؤالي=يا كم ودى بالليالي ولا جاب
في ديرة صار البعيد الموالي=والا الحقيقة كلنا بسكة أغراب
أحدٍ يجاملني على شأن مالي=وأحدٍ يخادعني وهو جنس نصاب
أضحك وأنا في داخلي هم كالي=وأكتم جروح القلب والجرح ما طاب
محدٍ يعرف بشيء داخل خيالي=هذي خطوط حمر حتى عن أصحاب
ما تفعله يمناي تجهل شمالي=واللي توقع غير مخطي ولا صاب