أسعدكم الله
كل مساء أنتم على موعد مع الأبيات
علها تروق لكم
يا صاحبي عساك للجنه=وينك عسى ما بأس يالغالي
شهرين ما رنيت لي رنه=غيبتك عني مشغله بالي
الشوق جا له بالحشا حنه=حنة خلوج بيدها عقالي
أتابع الونات بالونه=شيبت فيَّه يا بعد حالي
يالمزنه اللي بأوسط الكنه=متى سحابك يروي جبالي
تسقي من الساحل ليا القنه=يالمزنه اللي نوها عالي
خيرك سقا غيري بلا منه=وأنا تعصف الريح برمالي
برق ورعد متوالي الدنه=وأربع سنين السيل ما سالي
محموس قلبي حمسة البنه=كني على جمر الغضا الصالي
أقرع كما ما تقرع الشنه=في عاصفك مقفا ومقبالي
أحسنت فيك الحدس والظنه=سلمتك الخافق ولا أبالي
سنيت لك من نابضي سنه=سنة وفا بعهود رجالي
لو الرماح ايجي لها خنه=يبقى غلاك لقلبي موالي
مهما يطول البعد والهنه=عندي عزيز بكل الأحوالي
يا صاحبي عساك للجنه=وينك عسى ما بأس يالغالي