أسعدكم الله بكل الأوقات
تخيل لك صاحب وإلا رفيق واتصلت به تحب تسأل عن صحته واحواله
مالك عنده اي حاجة ولا أنت محتاج منه لشيء
وسمعت منه رد ما أعجبك الأبيات تلامس هذا الجانب عند بعض البشر
وأترك المجال للشعراء لمن يحب الكتابة في هذا الصنف من الناس
والله غريبة يازمان الغرايب=أنشد صحيبي قال لي خير ياطير
من حقك اسأل عنك لا كنت غـايب=والقصيد أحب تكون في صحه وخير
ما قصدي أطلب منك ما أنته بثايب=وإن كان هذا يزعجك بقطع السير
الله يجنبكم جميع المصـايب=ما فيه داعي للعتب والمعاذير
ماني بشيطانٍ(ن)يفرق حبايب=ولاني بجاهل ما يميز محاذير
روح بطريقك طبت والبال طايب=الله يسهل لك دروب المشاوير
درب السلامة مع مهب الهبايب=روحة بلا رجعة ولا عندنا غير
بكرة يدور الوقت وتعود تايب=ترجع لنا مذلول ومهان وصغير
لا تحسب إن المجد فعل الغرايب=وإلا بكثر المرجلة والدنانير
عز الرجل لا صار حوله قرايب=يلقى بجنبه فاللوازم مناعير
حصنٍ(ن)منيع ليا دعته النوايب=وإلا غزاه من المعادي مغاوير
يغدون حوله مثل جيش وكتايب=ما يطلبونه بالمواقف مساعير
ومن باع ربعه لو غدا شيخ شايب=ماهو بلاقي عندهم أي تقدير
مهما تعلى في زمانه ركايب=لا صار مابه خير سمعته تحقير
لا من ذِكر اسمه تبين المعايب=هذاك ناكل نذل مايريط العير
شرواه مثل البوم جوف الخرايب=ماله ثمن لو طب سوق الصقاقير
وإن غرته دنياه بيموت خايب=لو سجلوه بغتس ضمن المشاهير
والله غريبة يازمان الغرايب=أنشد صحيبي قال لي خير ياطير