ياهجوسٍ(ن)تجيني كل ما حل ليل=تحمل أحلام ليل وتحمل هموم يوم
ياحلوم تزور ومدها لي جزيل=كل ليلة بفكري مثل طيرٍ(ن)يحـوم
خبريني عن اللي ما عرفته بخيل=غاب مدري جفا وإلا غيابه لزوم
عدة أيام ماني عارفٍ(ن)للدليل=وش سبب غيبته ما رد صادق علوم
ياعشيري عساك بخير ماأنت بعليل=لا يطول غيابك ياجميل السلوم
ريح القلب طمني بشيءٍ(ن)قليل=الرسالة تريحني بصحوٍ(ن)ونوم
كل ماهو يجيني منك عندي جميل=غير صدك وهجرك ياربيع الحلوم
طمن الروح ياروح الهوى ياخليل=لا تزود على العاشق بصمتك هموم
كل صعب أتحمل غير صدك يا ويل=ويل حالي من غيابك بليا فهوم
غيبتك سقم حال أمسيت منها نحيل=كني اللي مسقينه ذحاح السموم
صرت عقب الشجاعة من غرامك ذليل=ما قويت أتحمل منك رمي السهوم
طالبك كان تقدر تحتمي للدخيل=طالبك بالتواصل ما طلبت معدوم
يا عشير الليالي واطلب المستحيل=وأبشر إني لأجيبه لو طلبت النجوم
المهم المهم الوصل ماله بديل=لا تضحك علينا بالغياب الرخوم
خل نهر الواصل بيننا سلسبيل=كان تبغا المحبة يا حبيبي تدوم
ريح الهاجس اللي كل ما حل ليل=يحمل أحلام ليل ويحمل هموم يوم