يا نبت ريحان ٍ(ن)على جنب ساقي=لن هبه النسناس عوده تمايل
ريحك مع النسناس زاد إشتياقي=شوقٍ(ن)مسوي في خفوقي غلايل
مشتاق لمصافح يدين وعناقي=شوقي عظيم وزودته الرسايل
كل ما قريت حروف حلو المذاقي=طارت بي الأحلام والحظ مايل
أنا وحلمي للقا في سباقي=والعمر يركض بان فيني دلايـل
كن الزمن وده بساعة فراقي=وأنا أتمنى منه يصنع جمايل
ياما فؤادي للقا معك تاقي=لكن ظروف الوقت تمنع وصايل
مدري متى نفرح بوقت التلاقي=يمكن تطيب جروح سوت هوايل
خلف الضلوع الناحلات الرقاقي=اللي براها لهف ماله بدايل
غدت عروق القلب منها حراقي=الشوق عامل في حشايه عمايل
والله يعلم كم من شوق باقي=ظني كثير وما مضى لي قلايل
هذا حسب ماني من الحب هاقي=حبٍ(ن)مسوي للمشاعر علايل
ينحت بقلبي والمشاعر تساقي=خلف الحلوم وباقي العمر زايل
يا نبت ريحان ٍ(ن)على جنب ساقي=لن هبه النسناس عوده تمايل