أسعد الله أوقاتكم بكل خير
لا تحرجيني يالغلا بالسؤال=أعرف جوابه مثل ما تعرفين
لكن لو قلته وهذا محال=أخاف مني يالغلا تزعلين
مقوى زعلك ولا أتحمل جدال=خليني بحيره لحلمي رهين
دعيني أحلم والليالي طوال=حلو الحلوم ولا مرار اليقين
أحلامي أكبر من كلامٍ يقال=لو بحت لك بالسر ماتقدرين
ياما كتبتك بالشعر والمقال=وياما حضنتك بين رمشٍ وعين
ياما رسمتك واقعٍ في خيال=وياما تنفستك قبل تسألين
أهمس لطيفك ياحبيبي تعال=أتخيل أضمه بكلتا اليدين
وليا سألتيني يجيني هبال=من خوفي إن اللي أبي ماتبين
لا تنشديني دام في إحتمال=بصبر لو إن الصبر ماهو بزين
دام الصبر بالروح لاقي مجال=خليني ابقا للتصبر سجين
وإن ضاقت الدنيا وعز الوصال=الك العهد منساك والوعد دين
وأنتي على كيفك ياذات الجمال=ماني براجي شيء ما تملكين
اما تعالي واشربي من زلال=وإلا اتركيني بين شده ولين
شدة صدودك يا شبيه الغزال=وفسحة أمل والله لحالي يعين
عرفتي ليه أكره جواب السؤال=ليا كان مابه حل لا تعرفين