وعليكم السلام ورحمة الله وبركاته
ويستمر التواصل
اليكم هذه الأبيات علها تروق لكم
يا قلب ما كفاك في دنيتك هم=اليوم يا قلب العنا صار همين
أتلف لي الأعصاب وأحرق لي الدم=والدمع من كثر البكا جَرح العين
الهم الأول هم حالي تحكم=لوع ضلوعي والعنا بالزمن شين
أبكي على حالي ولا فاد مندم=أنوح نوح اللي تثاقل به الدين
كني غريق يقالبه عاتي اليم=امقيد الرجلين ومكتف يدين
في داخله حيتان ماهي بترحم=تناهش أطرافي بلا وازع ودين
الحوت الأول عشق ناعس ملثم=ما ظن مثله بالبشر كامل الزين
والحوت الأخر بعد من كان بلسم=حده زمانه والبعد صار بعدين
الحال من بعده كما حال ميتم=من يوم فرق بيننا نازح البين
وأكبر مصيبة حال خلي تحطم=من لوعة الفرقا وجور القريبين
يا قدرة الله كيف قلبه تقسم=بين الرجا والياس والجور واللين
ساعة عرفت بحالها صابني غم=صارت هموم الروح بالقلب ضعفين
همي وهم اللي عسى يوم ما اعدم=شوفه ولو يمضي على بعده سنين
اليا سلم عود الغلا خير مغنم=باق الهموم تزول لو كان بعدين
عساك يا سيد الغنادير تسلم=من كل هم وغم وأحوالنا تزين
اليا التقينا كل جرحٍ(ن)تقدم=وكاد أنا بنساه وأنتي بتنسين
إصبر لو إن الصبر بحيان علقم=عل الفرج يقرب ونرتاح الأثنين
يا قلب ما كفاك في دنيتك هم=اليوم يا قلب العنا صار همين