أميرة شعري المكتوب في وجنة محاسنها=تغنى بالقصيد اللي كتبته في وصايفها
عليًه لحنها وحروفها وإلهامها منها=قصايد لأجلها من داخل الوجدان قاطفها
وأنا مهما يطول العمر ماني منتحي عنها=لها منها مشاعر قلبي اللي فيه راصفها
قصيدي مرتوي من لهفة بالجوف دافنها=مشاعر صافية للعشق ظاهرها وباطنها
يا وردة عشقي المجنون دنيانا مجننها=غرام ٍ(ن)في خفايا الروح يظلمها وينصفها
ليا مني ذكرتك ثارت الجن بمساكنها=تصخر للقوافي كنها خيل ٍ(ن)تعسفها
لأجل عينك ومنطوقك بيوت الشعر يفتنها=جمال ٍ (ن)تحتوينه بالحلا كيف ٍ(ن)يكيفها
أنا داخل على ربي من عيون ٍ(ن)تمكنها=سحر هاروت ساكن بالعيون اللي مشرفها
عساني فدوة ٍ(ن)تقويسة الحاجب ومقرنها=عليًه تأمر وعهد ٍ(ن)عليًه ما بخالفها
أنا وشلون أخالف درة ٍ(ن)قلبي مثمنها=عليً أغلى من الروح العزيزة مع معارفها
يا بهجة روحي الولهى ومسكنها وموطنها=متى حلو الوصوف تعانق لحي ٍ(ن)موالفها
متى تسقي سحايب غر كبد العشق قاطنها=لأجل تحيا عروقٍ(ن)يابسة من عشق ناشفها
أميرة شعري المكتوب في وجنة محاسنها=تغنى بالقصيد اللي كتبته في وصايفها