لعل الك البقا ياللي تجيب من العلوم علوم= وانا اشوفك تهد عشاش وتعود تبنيها
احد معطى بها الدنيا واحد ياشيخنا محروم= ولايبلش يكود اللي حبال الطيب يلويها

بلانا وقتنا ياصاحبي في وقتنا برخوم=عيون مفتحة وقلوبهم مولاك معميها
أبني فالقصور العامرة والبوم يبقا بوم=وهذي سنة الله فأول الدنيا وتاليها

متى ياشيخنا فوق الرخوم تصدر المرسوم= مااصدق لين اشوف السيف شغله في علابيها
انا اشوف التهامي في بريمه خنجره مسموم= مرار (ن) في يده ومرار في وسطه يخفيها

أشوفك شايل(ن)حملة على غر بعد مفطوم=وأنا أقول المطوع شايل الختمة وقاريها
أنا ما ناظر لغربان في كبد السما بتحوم=تناغق بالخلا والله مسودها وباليها

انا حافظ كتاب الله واطبق سنة المعصوم= ورجلي في دروب الخير تثبت في مواطيها
ترى اللي فالسما ماهو سواة الطير ابو زلقوم= معه جملة طيور وسمها عندي ويفنيها

يدامك لا تحطه جوف قدر من تحت مخروم=وتيبس كبد من الوقت ما تقدر تداويها
ياراع الصدق درب الصدق بين للعرب مفهوم=تريح وأترك البدوان ترعى في مفاليها

انا عيني تقديني ولا امشي مع ردي عزوم= توصيني وانا اقول الك تعط القوس باريها
جمال عقيل في ديرة عقيل بوسمها الماسوم= لكن اللي همل من دون وسم احذر بلاويها

أوصي صاحبي والعبد ما يهرب عن المقسوم=لكن العين في غفلة تودي روح راعيها
شعيل الله يجيرك كيتي بين على الزلقوم=وقوم بليس أنا يا صاحبي ماني بهاميها

نصايحكم على عيني ولا لايم ولا مليوم= الا ياكاتب الحجه يبا ينقدك قاريها
تراك انت السبب جبت العصيد ولحمة المفروم= ولانظمت سفرتك الكريمه يامسويها