أنا شاعر ليا دقيت باب الشعر قال:اهلين=يرحب غصب عن خشمه بلا شكرٍ(ن)ولا منه
أنا لن هزني طاروق ما قلت:انتظر بعدين=أروض صعب طاروقي وأزيح الشك والظنه
أعسف للقوافي صعبها لن شافني بيلين=وأحمس للمعاني حمسة الحماس للبنه
ليا جات القوافي مقبلة لقنتها تلقين=طعنت صدورها برماح معنى فكري يسنه
معك جني وأنا عندي جنون الشعر فوق الفين=وكل شاعر يكيف قافية شعره حسب جنه
لكن الدين يا ابن الناس مايقضي لزوم الدين=ولا ينعد كامل دين منهو خالف السنه
يا راع أربع بيوتٍ جابها ماجابها تسعين=وقام يلج صوته يحسب إنه داخل الجنه
على هونك ترى بينك وبين الشعر عشر سنين=توقع لا يغرك من ضحك من شهرتك سنه
ترى لمس السماء ما جربه منهو خُلق من طين=ولا طال الثريا من ركب للروز والدنه
يا شين الكبر في واحد يعد من العرب مسكين=وأظن أغبى منه من يرتجي للسمن بالشنه
مصيبة من يطيح بحفرةٍ(ن)والله عطاه العين=ليا شاف الخطر بالدرب كان مجنبٍ(ن)عنه
لكن الله مقسم للعقول الزين غير الشين=وهذي سنة الله بالبشر تصريفها منه