العنود اللي هواها سم حالي=تشتكي من برد واشكي من حروره
ليتها قريًب واناديها تعالي=تكتهن عندي عن البرد ورشروره
ذي مناة الروح في كل الليالي=صورةٍ(ن)بالقلب ماهي بأي صوره
ما عشقت لغيرها فأول وتالي=حبها سيطر عليً بدون ثوره
واقع الترفة تمكن من خيالي=واستبد بواقعي واطعت شوره
إن شكت شكيت من جرحٍ(ن)موالي=خلف عوجٍ(ن)بالمواجيع معسوره
حبها بالقلب مشغل كل بالي=من سنين طوال بصمته محفوره
بالقصيد وبالفعول وبالتسالي=المشاعر بالهوى دوم معموره
لو شكينا من بعاد ومن وصالي=في غيابه لهفتي مثل حضوره
الغرام اللي زرعنا ما يزالي=تكبر غصونه ونزرع من بذوره
حبنا عالي ويبقى دوم عالي=والنوايا بالوفا دوم مخبوره
حيثها عندي تفوق لكل غالي=معجبتني دامها بي مغروره
العنود اللي هواها سم حالي=تشتكي من برد واشكي من حروره