لو لا الغلا ما كان تعبن الأرواح=ولا هزني الشوق مع هبة الريح
أداري الأشواق وأشعاري إفصاح=أنهض على طيفك من النوم وأصيح
ودي أضم الطيف قدام ينزاح=عله يهدي روعة القلب ويريح
لكن يا ويلاه مع نهضتي راح=والدم أحسه في شراييني يفيح
أصيح حين الشوق في داخلي صاح=والوجد جرح ساكن الروح تجريح
مرت ليال طوال وغروب وأصباح=وأنا على ذا الحال من باح في باح
أشكي مواجيعي على نزف الأجراح=وأضحك لهمي وأمسك اليأس وأطيح
حتى نسيت أيام حلوات وأفراح=ما باقي الا صوت ونة مطاريح
كل مالزمت الصبر من حالتي ناح=غديت أنا وإياه مثل المجاريح
متى دخيلك تنهي الوضع وأرتاح=تعبت من طول السرى والمراويح
وأتعبت شعري والقوافي والألواح=وأتعبت صفحات الورق والمسابيح
الى متى كني على خافق جناح=تومي بي الأحلام ليل ومساريح
ظنك بعد طول العنا فيه مرباح=والا أعذر وأمسح الحلم تمسيح
والا أكمل باقي العمر يا صاح=حتى لو إن الحلم مابه مصاليح
أركض ورى الأحلام لو تطلع أشباح=وأكتب قصائد تعطي النفس ترويح
لو لا الغلا ما كان تعبن الأرواح=ولا هزني الشوق مع هبة الريح

أبـن هليـل صــح لسـانك .. ننتــظر أبداعك القــادم بكــل شــوق

ونغرس في كل نجم حكايا وننسج الأحلام كما نشاء ..
وقد تفتح لنا الأحلام كل باب إنما تبقى مجرد أحلام نهرب معها من واقعنا ..
وتعاودنا الأحلام ..أو نعاودها ونعتادها
أستاذي /قد تكون كلمتي قاسيه مع عذوبة حرفك
هي مقطوعات مصفوفة كعقد اللؤلؤ رغم
مافيها من ألم لكنها اجتازت حرم المشاعر
لها ميزه لايستشفها الا ذوي الحس المرهف ..
استرسال بديع الاحساس
يتدفق من عاطفة يغرقها الشجن
أستاذي دمت ودام نبضك