لا تنشديني كيف حالي بلياك=الحال ما يعجب ولاني برايق
غديت مثل العود مقطوع من راك=اسبوع وأنا الصدر بلحيل ضايق
يلعب بي الهاجوس من كثر ما أهواك=شارد ذهن والبال ماهو بفايق
ودي بشوفة ياغرامي محياك=غديت أنا والشوق مثل الشقايق
لن مرني اسبوع من غير ما أراك=أحس في صدري سواة الحرايق
كن الفراش يصير من نار وأشواك=أحلم بشهد لوصل ماني بذايق
بنظم قصيدي فيك وأقول لولاك=تسوى التعب ماصرت للوصل تايق
حتى القصيد ايصاب بجنون وإرباك=لن حال مابيني وبينك عوايق
أدورك بين القوافي ولا القاك=يسبق عليَّ الشك قبل الحقايق
أهواك ايه أهواك لكن شكاك=من زود حبي صرت ماني بطايق
أخاف للأيام تبطي بملفاك=تبعد بك ركاب الفراق الطلايق
وأخاف لا ضيق المشاعر بعد جاك=واحترت ما بين الطرق والطرايق
عل البني يا قرة العين تفداك=عليك ضيق الصدر ماهو بلايق
وليا نشدتي كيف حالي بلياك=الحال ما يعجب ولاني برايق