يا غرام المشاعر يا هوى قلب شاعر=كل ما جئت في بالي تراقص خفوقي
الخفوق المولع فيك يا شوق فاكر=يذكرك بالغروب ويذكرك بالشروقي
وبين هذا وذاك البال بالحب ثاير=قلبي اللي فتنته زاد فيني فتوقي
وده ايفج صدري ثم يأتيك طاير=مير من دونه ضلوعي ودم العروقي
ساجن القلب في صدري يهل العباير=محترق من هواك ومحترق من حقوقي
الزمن والعمر والحظ قامت تجاكر=كلها مقفية والفوز للي سبوقي
آه يا قلب جابر وآه يا حظ جابر=ما تجمل زماني لأجل بالي يروقي
أبعد اللي جماله بالخراعيب نادر=من سنين أتبع أطيافه بليا لحوقي
الزمن صار ناكر والبخت صار ناكر=كل ما قلت تصلح زودت للعقوقي
ضاع عمري بظن الجود في يوم باكر=لين مليت مير القلب عيا يفوقي
منغمس في غرامه قصر الأحلام عامر=ما درى بالزمن غدار خادع سروقي
لا متي يا غرام الروح بكون صابر=الصبر له حدود وبالتحمل فروقي
والهواجس تلاعب بالشعر والمشاعر=دام وقتي عنيد ودام ولفي شفوقي
ما عليه من الاوجاع بحيا مكابر=لين وقتي يزين القلب باقي يتوقي
لأجل عين الوليف أفني لعمري مثابر=الهوى ما يعرفه غير منهو يذوقي
لذته في عناه ومتعته بالمخاطر=لو تأصل على ما قيل لزم الحلوقي
والله إني ما سيبك يا حسين النواظر=لين يرمى علي الطين والرمل فوقي
أنت حلم الزمان اللي ملا للحناجر=وأنت جمرة غرامي وأنت لمسة رفوقي
صح بعدك بصدري مثل طعن الخناجر=بس منك أستمد الحس بأعذب طروقي
يا غرام المشاعر يا هوى قلب شاعر=كل ما جئت في بالي تراقص خفوقي