الصاحب اللي كل ما قلت محتاج=ضحك حجاجه والردد كلمة أبشر
ما حط له من دون مطلبك منهاج=والا تعذر لأجل شرواك يعذر
ما قال لك مطلبك سبب له إحراج=والا صدمك بقول والله مقدر
اليا أظلمت دنياك يغدي لها سراج=ما تروح من عنده وخاطرك مكدر
مثل المطر بالخير والجود ثجاج=وليا حداه ظروف عونك لتصبر
ياقف معك ويشوف للضيق مخراج=يرقا سنود ولا يجي لك محدر
علمه عدل ما يجيك بالعلم منعاج=فعله يسابق كلمته ما يوخر
راسي رسو طويق في وسط الافجاج=ما تهزه الأرياح وعصار مغبر
يمشي قدم ما يجيك بالدرب مواج=يقابلك بالطيب ما يروح مدبر
ذاك الخوي اللي يفدا بالأبراج=ومن لا شكر للطيب ما يوم يشكر