أرعد خفوقي ولاح الطيف مثل البروق=هليت به ياهلا ياشمسي الطالعه
ياتاج عذب القصيد وتاج نبض الخفوق=ياوردةٍ(ن)في بساتين الهوى يانعه
هواك يجري بدمي في جميع العروق=لكن مدري وش الدنيا بنا صانعه
انا وربي عليك من المتاعب شفوق=وانتِ عليه بسحرك ياغلا باتعـه
ملكتي القلب كله والفكر والنطوق=في كل شئٍ(ن)وربي فاتنة بارعه
هذي مشاعر فؤاد وباللسان الصدوق=قلته لعينك وروحي للهوى طايعه
جيتك من أقصاي كلي عاشقٍ(ن)لمعشوق=مشاعر العشق فيني مالها دافعه
فداك كلي يا نبع الطيب ياطيب ذوق=انت بحسنك وذوقك معجزة سابعه
لن زارني طيفك السارح قبيل الشروق=ايفز له قلب حبك داخله طابعه
يوقد لنار الغرام بشوق ويزيد شوق=مشاعري في سناها من زمن واقعه
ما حيلتي غير ونة زلزلت للطروق=لن حولت فوق صدري كنها الصاقعه
لا من تذكرت دونك الف عايق وعوق=غير المسافة وديرة بيننا شاسعه
يضيق صدري من الحسرة بليا رفوق=وتضيق في عيني الدنيا ولو واسعه
يا مشغل القلب علك للوجع ما تذوق=خل المواجع لقلبي خافضة رافعه
ما عاد تفرق معي في كل حال محروق=أحسن ليالي زماني ماهي براجعه
ما بين حاضر وماضي ياعشيري فروق=وأطمع لذكرى قديمة للهوى شافعه
وإن كان عيت لتشفع لا توقع بروق=ماهو بقي من عمر بقضيه بمصارعه
ما بين عل وعسى ياليت ياهم سوق=وأخر مطاف الأماني ساعة النازعه
أرعد خفوقي ولاح الطيف مثل البروق=هليت به ياهلا ياشمسي الطالعه