على الكوكب اللي تحت شمس . وقمر . ونجوم = ودنيا تدور وتدّرج كنها المكره
تعدّا الوعد قبل امس وامس ونهار اليوم = وصرت انتظر قدّام بكره بعد بكره
يعيش الأمل ويموت ماقلت له مرحوم = ولا له براسي لامجالٍ ولا فكره
يطير الصقر مجبور عن وكره المعلوم = ولن فكّه الله ما انشبك عاد الى وكره
أقول القلوب البيض : شالت فرح وهموم = واقول ان قلبٍ يكنز الحب ما يكره !!
أسكاره حلال ومنه معطى منه محروم=تخيّلت كاسه ليتها طالت السكره
سقاني بكاسٍ عن جميع البشر معدوم = على جوّ.. كاس (( قيس )) الاحباب مبتكره
الا وا .. حسوفه كان راح الغلا للقوم !! = وعشنا كذيّا .. وعاش خلّي على ذكره
عليّ الحرام اليا ذكرته يطير النوم = ويفترّ قلبي فرةّ السير للبكره
ترى شرهة الطيّب على الطيّبين تدوم = وراعي الحيل والمكر ما ينفعه مكره
إلى كبرت الدعوى .. وجا راعي الزقوم = يموت الذي يصَطاد في المويه العكره
أبا آخذ .. وابا اعطي .. لين يركد بسوق السوم = ومن ركبوه الحق .. مايقدر .. لنكره
ولا عاد تنفع به شفاعه وحب خشوم = سكن ذاري النسناس والموت له سكره
ألأا يامَلاَيكْة الرضا هاتي المقسوم = من الله وانا عبده وحق الولي شكره
صبرنا وزاد الصبر .. عن حده المرسوم = وياشين صبر الآدمى لا انتهى حكره
ترى من تعالى بالخطا فاللقا مهزوم = مثل من يطالب مالك البكر والبكره
ألا ياهل الذود القديم العلوم عْلوم=وبعض الحقوق تنزّل الحر عن وكره؟

سلمان عزيز الحافي

ابو راكان

صـــــح لسانك وعتلا شانك

بيض الله وجهك على القصيده المتميزه

سعدت بقراءة الدره الراااااااائعه

الله يعطيك العافيه


تقبل تحياتي