من لاحسب للوقت حسبة وحسبات=يفوت عمـره ماحسـب للندامـه
الموت هين لكن الذنـب حسـرات=والذل خيـب ماوصـل للكرامـه
ياماجنينا سبـة الضعـف ويـلات=وياماتعبنـا ماكسبـنـا السـلامـه
هذا رفع خشمه يبـي رفعةالـذات=وهذاخفض راسه نديـم الشهامـه
والصاحب النايب مع الخيرفزعات=طيبه ملأ جيبه وحـاش إحترامـه
لاهب نسناسه كما الديـم بسكـات=يسقي ضمئ روحك وتنبت ختامـه
تاقف له الشيمـه تحييـه مـرات=ومرن به النخوه تفاخـر علامـه
في ساعة عسرة يلبيـك ساعـات=يضمد جراحك ويشنـى الملامـه
ومن يأخذالدنيا خراصن وهقـوات=متصورن حالـه زعيـم الزعامـه
كما السقيم اللـي تسكنـه دويـات=ولابـرئ عقلـه عتيـد السقامـه
صاحي ولاصاحي مسحب جلنطات=فاهـم ولافاهـم رفيـق الرخامـه
شايف ولاشايف بلاقلـب نكبـات=فاضي ولافاضي شنيعـن كلامـه
راضي ولاراضي يدور بمتاهـات=سـاري ولاداري مهـوي جهامـه
إذاطلع يجنـح غريـب بشطحـات=وإذا ركد مقلـق ومطلـق سهامـه
لادور الراحـه تلاقيـه بشـتـات=ولاقطـع ايدينـه يزيـدك غمامـه
ملقوف متـورط سؤالـه إجابـات=طايرتقـول إنـه فريـخ الحمامـه
لاهبت رياحـه تدوكـر بسجـات=فاهي وهو راهي يغـرك سنامـه
خبلن كما طبلـن يطيـح بمطبـات=طابوق طرطنقي مطنـش طغامـه
ابعد عن دروبه وخذهـا سلامـات=لاتصحب الجاهل وتصبـح نعامـه
تدفن سنا روحك وترضى الإهانات=وأنت الحليم اللي تشيـد الهدامـه