والله إني ما هويتك يازعل والا بغيتك=لين شفتك في عيون اللي يعذبني زعلها
ما هقيتك يا زعل تقدر عليها ما هقيتك=والله إنه ما تهون دموعها تجرح نجلها
حينها لو كان لي مقدور بالخنجر ذكيتك=لين أطيب خاطر اللي صرت أنا داني أهلها
في قصيدي يا قصيدي كم كتبتك ثم قريتك=كم قريت أفراحنا اللي خفت من ضيقك قتلها
حسبي الله كيف تزعل يا غلا بعد عطيتك=كل عهد وكل وعد أشواقنا مبغى بدلها
أنت وحدك اهتويتك وأنت وحدك ارتجيتك=لين سكنتك بروحي منزلة محدٍ(ن)وصلها
بعت كل الناس قبلك يا غرامي وإشتريتك=المشاعر من عرفتك حبك الساحر دهلها
أنت حلم أيام عمري كم تعنيت ولقيتك=يا هنا روحي بروحك يا شذاها يا عسلها
ما شكيتك للبشر الا لذاتك إشتكيتك=أشتكي لك كل لوعة أنت سبتها واسالها
إن بغيت أجدد الحلفان وأقسم لك هويتك=كل ليل وكل يوم وعزة المولى لقلها
وإن بغيت أفداك يالغالي بروحي إفتديتك=قلبي وروحي وعمري فدوة الولف وخجلها
أنت محبوبي وروحي دم شرياني سقيتك=الغرام اللي أحسه قاسي ضلوعي نحلها
ما تفارقني طيوفك لا تحسب إني نسيتك=والله إنه ما شغل فكري سواك ولا مثلها
أتسلى بالقصائد مير ما عمري سليتك=ما هويتك بأول أيامي وأبنساك بتولها
والله إني ما هويتك يازعل والا بغيتك=لين شفتك في عيون اللي يعذبني زعلها

صحت أبدانكم اسعدني تواجدكم وردودكم


لكم جميعا خالص تحيتي

صحت أبدانكم اسعدني تواجدكم وردودكم


لكم جميعا خالص تحيتي