بيض الله وجه هاشم بياض الغانمين=ما توخر يوم ناديت في وقت اللزوم
يا عسى الرديان تفداه جعله ما يهين=قام بالماجوب والطيب عادة للقروم
من عزاةٍ(ن)تاج للرأس من ماض السنين=عزوتي لا من تعزويت من جور الهموم
يدحمون بجنب صامل قويٍ(ن)مايلين=الجعيد بماقفه راعي أفعال وعزوم
ماتراخا في لزومي على الجنب اليمين=سيفي اللي مالحقه الصدا وإلا ثلوم
يوم قلت:إفزع تحزم سليل الطيبين=الرجل ينقاس بالفعل ماهو بالعلوم
ما تهنا في منامه ولا غمض بعين=ما تكاسل ولا فضل على المأجوب نوم
الحمية في عروقه على تقوى ودين=وارثٍ(ن)للطيب ياعل فزعاته تدوم
ماتعذر يوم لجيت صوتي يا عوين=قال:يالبيه هذا النهار وكل يوم
من بعدها قدم الهيل والكبش السمين=في محلٍ(ن)عامره بالكرم حسب السلوم
البشاشة في محياه وضاح الجبين=ياعسى الشيخان تفداه كيًاد الخصوم
الشكالة فيدةٍ(ن)للرجال الصاملين=والمذلة فيدةٍ(ن)للهلايم والرخوم
بالبدية والنهاية سلام المسلمين=ياصل لهاشم عسى الله يجنبه السهوم
بيض الله وجه هاشم بياض الغانمين=ما توخر يوم ناديت في وقت اللزوم

صحت أبدانكم


سعدت بحضوركم


لكم تحيتي وتقديري