على شأنك بواصل للسهر وأهجر لذيذ النوم=مراقب جيتك وأعد نبض القلب لين تجين
ويبقى واجبك متى تجين بشهر وإلا يوم=على الله ما تطول غيبتك بأقرب زمن تلفين
مجهز لك كلامٍ(ن)زين وأرقب من طرفك علوم=سواليفٍ(ن)تريح خاطري والزين يعطي زين
تلاقينا يصفي للنفوس وينسي المهموم=همومه والليالي دايره ما بين عسر ولين
صحيح إن الحلوم كبار لكن حظنا المقسوم=ليا شفتك ولو ساعة تساوي فرحتي عامين
هناء روحي معك والنفس ما تحيا بغير حلوم=وماهو منكتب باللوح لابده تشوف العين
أعيشك حلم وطيوفك طيورٍ(ن)بالهجوس تحوم=على الموعد مراقب جيتك وأخاف لا تنسين
يقولون العرب بأمثالهم ترى الحظوظ سهوم=بواصل للسهر وأشوف يطلع زين وإلا شين
على الله ما يخيب الظن وأطلع منها محروم=مثل من راح يقضي دين لكنه رجع بالدين
على شأن الوعد والعهد مايخلفه غير رخوم=بواصل للسهر يوم وشهر وإلا بعد لسنين
قراري وإتخذته والأمر من جانبي محسوم=على الموعد بلا موعد هوانا راحة الروحين
على شأنك بواصل للسهر وأهجر لذيذ النوم=مراقب جيتك وأعد نبض القلب لين تجين